அறிந்த நிலவும் அறியாத குளிர்மையும். . .

என் வீட்டின் திருப்பத்தில் நான்

ஒருபக்கம் சூரியனும்
மறுபக்கம் நிலவுமாக
நீள்கிறது
அந்தப்பாதை

ஒருகதவை நிலவுக்கும்
மறுகதவை சூரியனுக்குமென
திறந்தும் மூடியும்
வைத்திருக்கின்றன ஒவ்வொரு வீடும்

என் பின் வருகின்ற சூரியனை முந்திக்கொண்டு
நிலவைநோக்கி நடக்கின்றேன்
அடுத்த திருப்பத்தின் நிகழ்வை
அறிந்தேயிருக்கிறேன்

என்னை முந்திச் செல்கிற நிலவு
முழுமையாக திறந்திருக்கும்
ஒவ்வொரு வீட்டினுள்ளும் பரவுகிறது

என் வீட்டினுள்
சூரியன் மாற்றிய உடைகளைப் போர்த்திக்கொண்டிருக்கும்
நிலவை
ஜன்னல் திறந்து வானம் பார்க்கச் செய்கிறேன்