கானகத்தில் தொலைந்து போதல். . .

தொலைந்து போவது நல்லது
அல்லது தொலைந்து போவதை உணர்வது நல்லது

பலமுறை தொலைந்து போயிருக்கிறேன்
பலமுறை என்னை மீட்டெடுத்திருக்கிறார்கள்

ஒருமுறை தொலைந்து போனபோது
எவருமே என்னை மீட்டெடுக்கவில்லை
நான் அப்போது பறவைகள் தேசத்திலிருந்தேன்
பறவைகளின் தேசம் என்பது
புதிர்களால் ஆனது

நான் எத்தனை விரும்பியும் வீடு திரும்ப
இயலவேயில்லை
சோர்ந்து போய்
அந்தத் தேசத்திலேயே தங்கிவிட்டேன்

இன்று
என் மகள் காணாமல் போய்விட்டாள்
எந்த தேசத்தில் அவளை தேடுவது என்பது குறித்து
குழம்பிப் போயிருக்கிறேன்

எனக்கு சிறகுகள் இருந்த போதிலும்.