படக்கதை

அவ்வப்போது எடுத்துக்கொள்கிற

புகைப்படங்கள் எல்லாவற்றையும்

ஒரு தொகுப்பாக

சேமித்து வைத்துக்கொள்கிற வழக்கம்

என்னிடமில்லை

மேலும்

ஒரு புகைப்படத்திற்காக  

அணியும் உடையின்மீதும்

அத்தனை

கவனம் கொள்வதில்லை 

 

அன்றன்று அணிபவையே 

அன்றன்றைய வண்ணம் 

அன்றன்றைய எண்ணமும்கூட

 

புகைப்படங்களுக்கென

பிரத்தேயகமாக உடைகளைத்

தெரிவு செய்து

உடுத்திக்கொண்ட நாட்களும்

எனக்கிருந்தன

என்பதை

தற்செயலாகக் கண்ணில்பட்ட

பழுப்புநிறப் புகைப்படமொன்று

நினைவுபடுத்தியது

 

எதற்குப்பதிலாக

நாம்

எவற்றையெல்லாம்

இழந்திருக்கிறோம்

அடைந்திருப்பவையெல்லாம்

ஆசைப்பட்டவைதாமாவென

அரிதாகத்தென்பட்ட 

அந்தப்புகைப்படம்

யோசிக்கவைக்கிறது

 

மனதின் ஆழத்தில்

உறைந்திருக்கும்

ஒரு தருணத்தை

அல்லது

முகச்சாயலில்

படிந்திருக்கும் ஒரு மனநிலையை

மீண்டும்

மேலெழச் செய்துவிடுகிறது

ஒரு

பழையப் புகைப்படம்

மிக எளிதாக.

 ***

 

அவளொரு ஆரண்யம் 

வான் பொய்ப்பினும்
தான் பொய்க்காத் 
தன்மை கொண்டது
அக் காடு
கோடையோ, குளிரோ
பருவம் எதுவாயினும்
பசித்த வாய்க்கு
தேனும் ஊணும்
தேடாது கொடுக்கும்

 

வெங்கோடை
ஒன்றில் 
பற்றிக்கொண்ட தீயில் 
வெந்து கிடந்த மரங்களிடம் சென்று
சிறுபறவையொன்று
தனக்காகத்
துளிர்க்கச் சொல்லிக் கேட்டுக்கொண்டது

 

அந்த வனம் முழுவதும்
ஒரு பறவையால் உருவாகியது 
அந்தப் பறவைக்கூட்டம் முழுவதையும்

வளர்த்தெடுத்தவை
முதுமரங்கள்

 

காற்றின் சிறுதீண்டலுக்கு
பழுத்த இலைகளை உதிர்க்கும் 
பெருமரமும் 
எதிர் நிற்கும் 
யாவற்றையும் புரட்டித் திருப்பும் 
பெரும் சூறையி்ன் நடுவேயும்
வீழ்ந்துவிடாது பற்றிக்கொள்ளும் 
பசுங்கொடியும் 
ஒன்றில் ஒன்றென இழைந்திருக்கும் 
அதன் சூட்சுமம் அறிந்தபோது

இயற்கையின்
முடிவுறாத திருவிழாவில்
தானுமொரு ஆரண்யமென 
உணரத் தொடங்கினாள்.

***

 

 

சாட்சியம் 

 

காலங்காலமாக
தன்னைத் தழுவிக்கிடக்கும்
கரையிடம்கூட

சொல்லத் தயங்கிய
இரகசியமொன்றை
கொண்டிருந்த கடல்,
தாளாமல் தனக்குள் தளும்பிய கணத்தில்
மேவியெழுந்த  காற்றின் காதுகளில் 
மெல்ல முணுமுணுக்க,
வட்டமிட்டுக் கொண்டிருந்த
வலசைப் பறவைகளோ
அதனை
வானத்திற்கு ஏந்திப்போக,
நீந்தவோ  பறக்கவோ
அறியாது
சாட்சியாக நிற்கும் பெண்ணின்
காட்சி முழுவதும் படர்கிறது

அது.

%

 

காவியாவும் அர்ச்சனாவும்

 இப்போதும்  

அவர்கள் புத்தகம் வாசிக்கிறார்கள்

அவரவர் அறையில்

அவரவர் விருப்பத்தில்

தேர்ந்து டிவி பார்க்கிறார்கள்
அத்தனை ஒழுங்கு அவர்களின் அறை

முன்பு ஒரு சமயம்
"அவ என்னைக் கிள்ளிவைக்கிறா'
அவ என்னை வம்பு செய்கிறா "
காவியாவும் அர்ச்சனாவும்
சேர்ந்திருக்கும் பொழுதுகள்
இப்படித்தான்

ஒருநாள் இவர்கள் ஒன்றாக இருந்தால்
ஒன்பது நாள் ஒழுங்கு செய்யும்படி
வீடு அப்படிக் கலைந்துக் கிடக்கும்
நிமிடத்திற்கொருமுறை ஓயாத சண்டை
நிமிடத்திற்கொருமுறை சமாதானமும்
நிமிடத்திற்கொருமுறை அணைப்பும்

இப்போது அவர்கள் வளர்ந்துவிட்டார்கள்.

**

"இப்பொழுது வளர்ந்து விட்டாள்" கவிதைத் தொகுப்பிலிருந்து.. 

 

 

என்னைப்போல் ஒருத்தி

வனத்தின் யட்சியென
மனங்கொண்டிருப்பவள்

மாலைக்கதிர்
மயங்கிச்சரியும்

கவனிப்பார் எவருமற்ற
தாமரைக்குளத்தில்
உவந்து
தன் பாதம் நனைக்க
காலாதீதமாய்
கருவறையில்
உறைந்திருக்கும்
மீனாட்சியும்
உள்ளம் குளிர்கிறாள்

தன்னைப்போல்

ஒருத்தியைக்கண்ட

அக்கணத்தில்.

**

 

நீலமும் இன்னபிற நிறங்களும்  

 

கடலும்

வானமும்

நீலமல்ல

 

நம் மனம் நிகழ்த்தும்

மாய மென்பதை

நுரைத்த அலைகளும்

கருத்த மேகமும்

உணர்த்த

 

மண்ணில்

காணும்

நிறமெல்லாம்

நிஜமல்ல

அவை

கண்ணின் கற்பிதங்களென

ஓசையின்றி

ஒலிக்குமொரு குரல்

உள்ளிருந்து உரைத்திடும்

அழுத்தமாக. 

**

பழமை

கடல் மிகப்புராதனமானது

அது

இரகசியங்களின்

அற்புதங்களின்

மேலும்

கனவுகளின் பெட்டகம்

 

மலைகளைப்

பெயர்த்தெடுத்துக் கொட்டிவைத்திருக்கும்

பாறைகள்தானா

பெருங்கடலை

அடக்கி விடும்

 

கடலின்  பழமைக்குக்

கடலே சாட்சி

 

ஆழ்கடலின்  ரகசியங்களை

பச்சைப்பாசி  படர்ந்த

பாறையிடுக்கு  நண்டுகள்

கூறிக்கொண்டேயிருக்கின்றன

 

ஈரக்காற்றின்

உப்புச்சுவையோடும்

கடல்  வாசனையோடும்

ஆழ்கடலின்  மௌனத்தைச்

கலைத்துக்  கொண்டிருந்தது

காற்றலைகள்

 

வெளி நனைந்து  சிலிர்க்கையில்

வெளிப்படுவது

பிரபஞ்ச சுவையும்

பழமையின் வாசனையுமே.

%

 "கடலோடு இசைத்தல்" தொகுப்பிலிருந்து..