முகவரி. . .

என் முகவரியைத் தேடி
அல்லது கேட்டு அலைந்தார்கள்
எனக்கும்
அவர்களுக்கு என் முகவரியை
குறைந்தபட்சம் என் தொலைபேசி எண்களைத்
தெரிவிக்க ஆசைதான்

நான் நடந்து செல்கையில்
எத்தனையோ கண்கள்
என்னைப் பின் தொடர்வதை
உள்ளுணர்வால் அறிவேன்

பெண் என்பதால்
எங்கிருந்து நோக்கும் விழிகளையும்
உடல் அறிகிறது
மேலும் அது பரவசப் படுத்துகிறது
என் ரகசியங்களைத் தேடி அலைபவர்களிடம்
ரகசியங்களைப் பகிர்ந்துகொள்ள ஆசைதான்

நான்
ஆடைகளால் மட்டும் சூழப்பட்டவள் அல்ல

கடந்து செல்கிறேன்
ஆயிரம் ஆயிரம் கனவுகளை
என் மீது காண்பவர்கள் பற்றிய
கனவுகளோடும்
ஆச்சர்யங்களோடும்
மேலும் சிறிது புதிர்களோடும்.
courtesy : Painting -Peter Cupcik