என்னைப்போல் ஒருத்தி

வனத்தின் யட்சியென
மனங்கொண்டிருப்பவள்

மாலைக்கதிர்
மயங்கிச்சரியும்

கவனிப்பார் எவருமற்ற
தாமரைக்குளத்தில்
உவந்து
தன் பாதம் நனைக்க
காலாதீதமாய்
கருவறையில்
உறைந்திருக்கும்
மீனாட்சியும்
உள்ளம் குளிர்கிறாள்

தன்னைப்போல்

ஒருத்தியைக்கண்ட

அக்கணத்தில்.

**

 

நீலமும் இன்னபிற நிறங்களும்  

 

கடலும்

வானமும்

நீலமல்ல

 

நம் மனம் நிகழ்த்தும்

மாய மென்பதை

நுரைத்த அலைகளும்

கருத்த மேகமும்

உணர்த்த

 

மண்ணில்

காணும்

நிறமெல்லாம்

நிஜமல்ல

அவை

கண்ணின் கற்பிதங்களென

ஓசையின்றி

ஒலிக்குமொரு குரல்

உள்ளிருந்து உரைத்திடும்

அழுத்தமாக. 

**

பழமை

கடல் மிகப்புராதனமானது

அது

இரகசியங்களின்

அற்புதங்களின்

மேலும்

கனவுகளின் பெட்டகம்

 

மலைகளைப்

பெயர்த்தெடுத்துக் கொட்டிவைத்திருக்கும்

பாறைகள்தானா

பெருங்கடலை

அடக்கி விடும்

 

கடலின்  பழமைக்குக்

கடலே சாட்சி

 

ஆழ்கடலின்  ரகசியங்களை

பச்சைப்பாசி  படர்ந்த

பாறையிடுக்கு  நண்டுகள்

கூறிக்கொண்டேயிருக்கின்றன

 

ஈரக்காற்றின்

உப்புச்சுவையோடும்

கடல்  வாசனையோடும்

ஆழ்கடலின்  மௌனத்தைச்

கலைத்துக்  கொண்டிருந்தது

காற்றலைகள்

 

வெளி நனைந்து  சிலிர்க்கையில்

வெளிப்படுவது

பிரபஞ்ச சுவையும்

பழமையின் வாசனையுமே.

%

 "கடலோடு இசைத்தல்" தொகுப்பிலிருந்து.. 

முடிவின் தொடக்கம்

இனி

செய்வதற்கு ஏதுமில்லை

அவ்வளவுதான்

என்றானபிறகுதான்

சரித்திரத்தின் அடையாளமாகிய 

சாதனைகளும்

மணிமுடிகளுக்கான

அதிகாரப்போட்டிகளும்

மாத்திரமின்றி

மகத்தான

காதல்களும்கூட

நிகழ்ந்திருக்கின்றன

 

நடக்கும் பாதை

முடிவுறும்போது

தன்னியல்பாக விரியத்தொடங்குகின்றன

இறக்கைகள்

வானத்தை நோக்கி.  

- "சொல்லினும் நல்லாள்" கவிதைத் தொகுப்பிலிருந்து. 

                                                             திடம்

அரிதான

அதனுடைய இருப்பையும்

அசாதாரணமான

ஒளியையும்

அதீதமான கடினத்தையும்

காணப் பொறாமல்

மீளவும் வந்து

முட்டி மோதிச் சிதறடிக்க

முயலுபவர்கள்

அறிவதில்லை

உள்ளுக்குள்

உடைந்து தேறிய பெண்ணொருத்தியின்

உள்ளம்

தீட்டவும் தீராத

திண்மை கொண்ட

வைரம் என்பதை.

**                               

 "கனவின் முற்றத்தில் தரையிறங்கும் தாரகைகள்" தொகுப்பிலிருந்து...

 

நிகழ்த்துக்கலை

புகைப்படக்கருவியின்

கோணத்திற்குள்

அடங்கிவிடுகின்றன

கட்புலனாகிற

காட்சிகள்

 

சட்டகத்திற்கும் அப்பால்

எட்டியவரையிலும்

எங்கும்

நிகழ்ந்துகொண்டிருக்கிறது

வாழ்க்கை.

%

#சொல்லினும் நல்லாள் கவிதைத் தொகுப்பிலிருந்து...  

மற்றொரு கடல்

ஒருமுறை கூட

கடல் பார்க்காத ஒருத்தி

எத்தனையோ முறை

மூச்சடக்கி

கடலின் ஆழத்தில்

முத்தெடுத்தவளைச் சந்திக்கிறாள்

முதன்முதலாக

அலைகள் பொங்கி

கால் நனைக்கத் தொடங்குகிறது

ஒருத்தியிடமிருந்து

மற்றவளுக்கு

கடல் பார்க்காதவள்

பார்க்கிறாள்

கடல் நீலக்கடலான

ஒருத்தியை

கடலை அறிந்தவள்

நனைகிறாள்

தான் அறியாத மற்றொரு கடலில். 

**